ប្រភពមកពី kohsantepheapdaily
ការបង្កកំណើតតាមបច្ចេកទេសទំនើប គឺការយកមេជីវិតមកចិញ្ចឹម ហើយចាក់បញ្ចូលទៅក្នុងស្បូន ដែលជាទូទៅឃើញទទួលបានជោគជ័យច្រើនសម្រាប់ស្ត្រីដែលមានវ័យចាប់ពី៣៥ចុះក្រោម តែចំពោះស្ត្រីដែលមានវ័យចាប់ពី៤០ឆ្នាំឡើងហើយនោះភាពជោគជ័យលើវិធីនេះមានតិចតូចបំផុត ។ នេះបើតាមការឲ្យដឹងពីលោកស្រីវេជ្ជបណ្ឌិត WanakanSinghasenaឯកទេសផ្នែកសម្ភពនិងរោគស្ត្រី នៃមន្ទីរពេទ្យ VEJTHANI ប្រទេសថៃ ។
លោកស្រីវេជ្ជបណ្ឌិតឯកទេសរូបនេះបានប្រាប់ឲ្យដឹងទៀតថា ចំពោះស្ត្រីដែលមិនមានកូនទាល់តែសោះ ហើយចង់មានកូននោះគ្រូពេទ្យនឹងជ្រើសរើសតាមបែបបង្កកំណើតតាមរបៀបបច្ចេកទេសទំនើប ហើយនៅពេលដែលភរិយាស្វាមីមកជួបជាមួយគ្រូពេទ្យ គ្រូពេទ្យនឹងពិនិត្យរាល់បញ្ហាមួយចំនួនដូចជា៖
-វដ្តរដូវរបស់ស្ត្រី
-មេជីវិតញីរបស់ស្ត្រី
-ពិនិត្យមើលស្បូន ដៃស្បូន តួស្បួន
-រាប់មេជីវិតឈ្មោលរបស់បុរស ។
ការបង្កកំណើតតាមបច្ចេកទេសនេះមានដូចជា៖
-ចំពោះជាបុរស ៖ មានបុរសមួយចំនួនមិនមានផលិតបញ្ចេញនូវមេជីវិតឈ្មោលមកក្រៅដើម្បីបង្កកំណើតបាននោះទេ ដូច្នេះនៅពេលដែលមកជួបជាមួយគ្រូពេទ្យ គ្រូពេទ្យនឹងធ្វើការវះកាត់យកមេជីវិតឈ្មោលមកចិញ្ចឹមនៅខាងក្រៅ ហើយចាក់បញ្ចូលទៅក្នុងស្បូនរបស់ស្រី្តជាប្រពន្ធ ។ ប៉ុន្តែបើសិនជាបុរសមានមេជីវិតហើយ តែមេជីវិតនោះខ្សោយ គ្រូពេទ្យនឹងព្យាបាលដើម្បីឲ្យមេជីវិតឈ្មោលមានសុខភាពល្អឡើងវិញ ។
-ចំពោះស្ត្រី ៖ គ្រូពេទ្យនឹងពិនិត្យមើលស្បូន បើសិនជាស្បូនមានបញ្ហាគ្រូពេទ្យធ្វើការព្យាបាលភ្លាម ។ ប៉ុន្តែបើសិនជាស្ត្រីមិនមានពងមេជីវិតញីទេ ជម្រើសចុងក្រោយត្រូវយកមេជីវិតញីពីបងប្អូន យកមកចិញ្ចឹមជំនួសវិញ ។
ជាទូទៅនៅពេលដែលគ្រូពេទ្យចាក់បញ្ចូលមេជីវិតឈ្មោលនិងញីចូលទៅក្នុងស្បូន គឺគ្រូពេទ្យនឹងធ្វើការចាប់បញ្ចូលជាលក្ខណៈភ្លោះ តែក៏មានស្ត្រីខ្លះអាចបង្កើតបានជាកូនភ្លោះ ហើយស្ត្រីខ្លះទៀត អាចបង្កើតបានកូនតែមួយប៉ុណ្ណោះប៉ុន្តែភាគច្រើនគឺទារកដែលកើតតាមវិធីសាស្ត្របច្ចេកទេសគឺច្រើនតែជាទារកភ្លោះ ។
អ្នកស្ត្រីវេជ្ជបណ្ឌិតបានបន្តទៀតថា តាមបទពិសោធកន្លងមក ការបង្កកំណើតតាមបច្ចេកទេសទំនើបនេះ គឺមិនមានផលប៉ះពាល់អ្វីទាំងអស់ចំពោះទារកក៏ដូចជាម្តាយ ។ ទារកដែលកើតតាមបច្ចេកទេសនេះ គឺមានកាយសម្បទានគ្រប់គ្រាន់ និងមានសុខភាពល្អដូចជាកុមារដទៃទៀតដែរ ។ ចំពោះការលូតលាស់និងភាពឆ្លាតវៃរបស់ទារកដែលកើតមកហើយនោះ គឺអាស្រ័យទៅលើគ្រូសារទៅវិញទេ បើគ្រូសារចេះយកចិត្តទុកដាក់ថែទាំកូនឲ្យបានល្អនោះ សុខភាពរបស់កុមារល្អហើយភាពវៃឆ្លាតក៏ទៅតាមនឹងដែរ៕
