Sunday, May 10, 2015
គ្រោះថ្នាក់ចរាចរណ៍បណ្ដាលឱ្យមនុស្សយើងខ្ទាំគ្រាំគ្រាទ្រូង និងសួត
ប្រភពមកពី kohsantepheapdaily
រាជធានីភ្នំពេញ ៖ អ្វីទៅដែលហៅថា «គ្រាំគ្រាទ្រូង និងសួត» នេះត្រូវបានលោកសាស្ត្រាចារ្យមហាបរិញ្ញាដួង ឆាយ ឯកទេសវះកាត់ទូទៅនៅមន្ទីរពេទ្យកាល់ម៉ែត បានឲ្យដឹងថា របួសគ្រាំគ្រាខ្ទាំទ្រូង និងសួតមានពីរបែបគឺ
១-របួសដោយមិនបែកធ្លាយស្បែក ។
២-របួសគ្រាំគ្រាដោយមុតវត្ថុរឹងគឺមុតឈើឬ មុតអំបែងកញ្ចក់នៅជាប់ឆ្អឹងជំនីរជាដើម ។
តួលេខមួយចំនួនដែលទទួលបានអ្នកដែលរបួសគ្រាំគ្រាទ្រូង និងសួតមានចំនួនប្រហែល១៨%នៃអ្នកជំងឺដែលចូលមកសម្រាកនៅផ្នែកវះកាត់ក្នុងមន្ទីរពេទ្យកាល់ម៉ែត ។
សង្កេតឃើញថា របួសគ្រាំគ្រាហើយមិនមានការបែបធ្លាយសាច់ស្បែកនោះមាន៧៤%ក្នុងនោះរបួសដែលធ្លាយសាច់ស្បែកមាន២៥%ហើយអាយុដែលជួបញឹកញាប់មានចន្លោះពី១៨ឆ្នាំទៅ៤៩ឆ្នាំ ជាអាយុដែលពោរពេញទៅដោយកម្លាំងពលកម្មដែលភាគច្រើនជាបុរសដែលមានរហូតដល់ទៅ៧៨,៥% មូលហេតុមកពីគ្រោះថ្នាក់ចរាចរណ៍ច្រើនជាងគេបណ្តាលឲ្យប៉ះទង្គិចសាច់ដុំ ឆ្អឹងជំនីរមានប្រហែល៥០%និងខូចខាតប៉ះពាល់ដល់ស្រោមសួតមាន៥០%។ ក្រៅពីនេះមានអ្នកជំងឺប៉ះទង្គិចខួរក្បាល បាក់ឆ្អឹងអវៈយវៈប៉ះទង្គិចពោះមានរហូតដល់៦៨%ករណី ។ មានន័យថា ការប៉ះទង្គិចមិនមែនមានតែសួតនិងទ្រូងទេ គឺមានប៉ះពាល់ផ្នែកអ្វីផ្សេងទៀតដល់ទៅជិត៧០% មានប៉ះទង្គិចក្បាល បាក់ឆ្អឹងត្រគាក បាក់ជើងដៃ ឬប៉ះទង្គិចពោះ ។
លោកសាស្ត្រាចារ្យមហាបរិញ្ញាដួង ឆាយ បានឲ្យដឹងទៀតថា ក្នុងតួលេខបានបង្ហាញថា ក្រៅពីប៉ះពាល់សួតគឺមានប៉ះទង្គិចក្បាលជាប់ចំណាត់ថ្នាក់លេខ១មានរហូតដល់៥០%ករណី ។ ការប៉ះទង្គិចដៃជើង អវយវៈ បាក់ឆ្អឹងឬរហែកស្បែកសាច់ដុំដៃជើងមាន៣០% និងការប៉ះទង្គិចពោះជាមួយនឹងសួតមាន២០% ។ រោគសញ្ញានៃការប៉ះទង្គិចសួត តើអ្នកជំងឺចូលមកមន្ទីរពេទ្យមានស្ថានភាពយ៉ាងដូម្តេចខ្លះ ? រោគសញ្ញានៃការប៉ះទង្គិចសួតគឺអ្នកជំងឺមានទឹកមុខឡើងស្លេកស្លាំងដោយសារតែបាត់បង់ឈាម និងមានការភ័យខ្លាច ហើយដកដង្ហើមមិនបានល្អ មានអ្នកជំងឺខ្លះទៀតស្វាយបបូរមាត់ ។
ពេលគ្រូពេទ្យពិនិត្យទៅឃើញថា សួតរបស់អ្នកជំងឺមានស្ថានភាពផតអាចមានរបួស ហើយជួនកាលមានឈាមហូរមកតាមមុខរបួសឬក៏មានខ្យល់នៅក្រោមស្បែកដែលស្ទាបទៅមានស្ថានព្រួកៗគឺវត្តមានខ្យល់ចេញមកពីសួតឬក៏ចូលមកតាមមុខរបួសពេលខ្លះអ្នកជំងឺថ្ងូរឈឺសួតខ្លាំង ។ អ្នកជំងឺដកដង្ហើមញាប់ហើយបើក្នុងស្ថានភាពធ្ងន់ធ្ងរនោះអ្នកជំងឺដេកដកដង្ហើមមិនកើតទាល់តែអង្គុយដកដង្ហើមទើបបាន ។ កាលណាអ្នកជំងឺប្រឹងដកដង្ហើមខ្លាំងតម្រូវឱ្យដាក់ខ្យល់អុកស៊ីសែនដើម្បីបង្គ្រប់ទៅនឹងការខ្វះខាតអ៊ុកស៊ីសែនក្នុងខ្លួនអ្នកជំងឺ ។ យើងពិនិត្យទៅលើរោគសញ្ញាផ្សេងៗទៀតនោះឃើញថាជីពចរអ្នកជំងឺអាចនៅធម្មតា បុ៉ន្តែអាចដើរញាប់បើកាលណាអ្នកជំងឺមានឈាមហូរក្នុងស្រោមសួតមានឈាមហូរនៅខាងក្រៅជីពចរ ហើយយើងសង្កេតឃើញទៀតថាសម្ពាធឈាមអ្នកជំងឺថយចុះបើសិនជាមានការបាត់បង់ឈាមច្រើន ។
លោកសាស្ត្រាចារ្យមហាបរិញ្ញាដួង ឆាយ បានបញ្ជាក់ថា គ្រោះថ្នាក់ចរាចរណ៍នៅតែជាមូលហេតុច្រើនបណ្តាលឱ្យមនុស្សយើងជួបប្រទះការគ្រាំគ្រាទ្រូងនិងសួតហើយបញ្ហានេះមកពីអ្នកទាំងនោះបើកបរក្នុងល្បឿនលឿននិងបើកបរមានជាតិស្រវឹងក្នុងខ្លួន ។ ពេលណាជិះកាន់់តែលឿនពេលមានគ្រោះថ្នាក់គឺវាប៉ះទង្គិចសួត និងសរីរាង្គដទៃទៀតកាន់តែធ្ងន់ហើយប៉ះពាល់ខួរក្បាល ឆ្អឹងត្រគាក និងអវយវៈផ្សេងទៀតផង ។ ក្រៅពីនេះអ្នកខ្លះមានជំងឺពីមុនមកផងដូចជា ជំងឺទឹកនោមផ្អែម ពុកឆ្អឹង ក្រិនថ្លើមជាដើម តែកាលណាប៉ះទង្គិចថែមទៀតនោះក៏កាន់តែមានស្ថានភាពអាក្រក់ដល់អ្នកជំងឺ ។
ជាសំណូមពរបើសិនជាបងប្អូនប្រជាពលរដ្ឋជួបហេតុការណ៍ដូចខាងលើមេត្តាប្រញាប់ប្រញាល់មកកាន់មន្ទីរពេទ្យកាល់ម៉ែតដែលបច្ចុប្បន្ននេះមានគ្រូពេទ្យជំនាញឯកទេសខាងវះកាត់ទូទៅយ៉ាងច្បាស់លាស់ដែលបានទៅសិក្សានៅប្រទេសបារាំង និងមានឧបករណ៍ទំនើបៗក្នុងការពិនិត្យឆ្អឹងបាក់ សួត និងខួរក្បាលផងដែរ ។ តាមរយៈសារព័ត៌មានកោះសន្តិភាពលោកសាស្ត្រាមហាបរិញ្ញា សុំអំពាវនាវដល់ប្រជាពលរដ្ឋនៅទូទាំងប្រទេសត្រូវតែគោរពច្បាប់ចរាចរណ៍ ៕
0 comments:
Post a Comment