Monday, August 24, 2015
វាយប្រហារអត្តឃាតនៅក្រុងកាប៊ុលស្លាប់12នាក់ ក្នុងនោះមានជនជាតិអាមេរិក3នាក់
ប្រភពមកពី kohsantepheapdaily
មនុស្សយ៉ាងតិច១២នាក់ ក្នុងនោះមានជនជាតិអាមេរិក៣នាក់ជានិយោជិតរបស់អូតង់បានត្រូវស្លាប់កាលពីថ្ងៃទី២២ សីហា ក្នុងការវាយប្រហារអត្តឃាតមួយប្រឆាំងកងកម្លាំងបរទេសនៅក្រុងកាប៊ុល ។
ការវាយប្រហារនេះជាការវាយប្រហារថ្មីនៅរដ្ឋធានីអាហ្វហ្គានីស្ថាន ដែលតាំងពីដើមខែនេះមកជាកន្លែងរងការវាយប្រហារយ៉ាងបង្ហូរឈាមនានារបស់ពួកតាលីបង់ ។
ពួកតាលីបង់បានបដិសេធថា ខ្លួនពុំស្ថិតនៅពីក្រោយការវាយប្រហារនេះ ដែលសំដៅលើក្បួនរថយន្តរបស់ក្រុមបេសកកម្មជួយទ្រទ្រង់ម៉ឺងម៉ាត់របស់អូតង់ក្នុងប្រទេសឡើយ ក៏ប៉ុន្តែកងកម្លាំងបរទេសរបស់អូតង់ និងកងកម្លាំងអាហ្វហ្គានីស្ថាន គឺជាគោលដៅវាយប្រហាររបស់ពួកបះបោរអ៊ិស្លាមនិយមនៅអាហ្វហ្គានីស្ថាន ។ ក្រោយការវាយប្រហារទាំងនេះបង្ហាញថា ពួកតាលីបង់មានលទ្ធភាពវាយប្រហារក្បាលម៉ាស៊ីនសន្តិសុខនៅកណ្តាលរដ្ឋធានីអាហ្វហ្គានីស្ថាន ។
ការផ្ទុះយ៉ាងខ្លាំងស្តាប់ឮក្នុងរង្វង់ជាច្រើនគីឡូម៉ែត្រកើតមាននាវេលាម៉ោង១៦ ម៉ោងក្នុងស្រុក ជាពេលម៉ោងចេញពីធ្វើការក្នុងសង្កាត់ MACROYAN ក្បែរមន្ទីរពេទ្យមួយ ។ អ្នកនាំពាក្យក្រសួងសុខាភិបាលអាហ្វហ្គានីស្ថានអះអាងថា មនុស្ស១២នាក់ស្លាប់ ហើយជាង៦០នាក់រងរបួស ។
និយោជិតស៊ីវិលរបស់បេសកកម្មជួយទ្រទ្រង់ម៉ឺងម៉ាត់របស់អូតង់ជាជនជាតិអាមេរិកម្នាក់ស្លាប់នៅនឹងកន្លែង ហើយ២នាក់ទៀតស្លាប់នៅមន្ទីរពេទ្យ ។
ទាហានអូតង់ប្រមាណជា១៣.០០០នាក់ និងនិយោជិតស៊ីវិលជាច្រើនពាន់នាក់ស្ថិតក្នុងប្រទេសអាហ្វហ្គានីស្ថាននៅឡើយ ក្នុងក្របខ័ណ្ឌនៃបេសកកម្មជួយទ្រទ្រង់ម៉ឺងម៉ាត់ជាបេសកកម្មជួយជាអ្នកប្រឹក្សា និងជួយបណ្តុះបណ្តាលកងកម្លាំងអាហ្វហ្គានីស្ថាន ដោយពួកគេជាគោលដៅវាយប្រហាររបស់ពួកឧទ្ទាមតាលីបង់ ៕
0 comments:
Post a Comment