ថ្ងៃចន្ទ ទី៩ ខែកុម្ភៈ ឆ្នាំ២០១៥ ម៉ោង ១០:៣៧
ការសិក្សាថ្មីមួយបានបង្ហាញថា ការប្រើប្រាស់ថ្នាំគ្រាប់ងុយដេក បង្កើនហានិភ័យយ៉ាងលើសលប់ដល់បេះដូង និងអាចបណ្តាលឱ្យស្លាប់ចំពោះបុគ្គលដែលធ្លាប់កើតជំងឺខ្សោយបេះដូង ។
ការពិសោធដែលមានរយៈពេល២ឆ្នាំរបស់ក្រុមអ្នកវិទ្យាសាស្ត្រជប៉ុនទៅលើអ្នកជំងឺខ្សោយបេះដូងទើបចេញពីមន្ទីរពេទ្យក្រុងតូក្យូចំនួន១១១នាក់បានរកឃើញថា អ្នកដែលលេបថ្នាំងុយដេក benzodiazepineប្រឈមនឹងការលាប់ឡើងវិញដល់ទៅ៨ដងធៀបនឹងអ្នកដែលមិនបានលេប ។ ឯមួយចំនួនបានឈានដល់ការបាត់បង់ជីវិតទៀតផង ។
អ្នកនិពន្ធអត្ថបទសិក្សា បណ្ឌិត Masahiko Setoguchiបានពន្យល់ថា៖«បញ្ហាដំណេកជារឿយៗគឺមានផលប៉ះពាល់ទៅលើបេះដូង ធ្វើឱ្យបេះដូងចុះខ្សោយ ហើយដំណេកមិនស្កប់ស្កល់កើតជាញឹកញាប់លើអ្នកជំងឺខ្សោយបេះដូងទើបចេញពីមន្ទីរពេទ្យ ។ ដូច្នេះពួកគេតម្រូវឱ្យប្រើថ្នាំគ្រាប់ងុយដេក ។ ទោះជាយ៉ាងណា ការផ្តល់ឱ្យបែបនោះ អាចនាំឱ្យពួកគេជួបផលវិបាកទៅវិញ ។ នេះគឺជាបញ្ហាដែលតម្រូវឱ្យមានការសិក្សាស្រាវជ្រាវជាទ្រង់ទ្រាយធំនៅពេលក្រោយ »។
ខណៈដែលការសិក្សានេះមិនបានបង្ហាញពី ហេតុនិងផល ដូច្នេះអ្នកស្រាវជ្រាវបានប៉ាន់ស្មាន ថា ថ្នាំគ្រាប់ងុយដេក benzodiazepine អាចប៉ះពាល់ទាំងមុខងារបេះដូងនិងទាំងការដកដង្ហើម ។
លោកបណ្ឌិត Setoguchiបានរំលឹកថា រាល់បុគ្គលមានជំងឺខ្សោយបេះដូង ជាពិសេសអ្នកមានបញ្ហាដង្ហើមពេលដំណេកដែលកំពុងប្រើប្រាស់ថ្នាំងុយដេក គួរតែពិនិត្យពិច័យឱ្យបានម៉ត់ចត់ ។ បើទោះបី នេះជាលទ្ធផលនៃការសិក្សាដែលមានទ្រង់ទ្រាយតូច ប៉ុន្តែ វាក៏ត្រូវបានទទួលស្គាល់ពីអ្នកជំនាញមួយចំនួនផងដែរ ។
លោកវេជ្ជបណ្ឌិត Sean Pinneyនាយកកម្មវិធីប្តូរបេះដូងនិងជំងឺខ្សោយបេះដូងនៅមន្ទីរពេទ្យ The Mount Sinai Hospital ក្រុងញូវយ៉ក សហរដ្ឋអាមេរិកបាននិយាយថា៖ «លទ្ធផលការសិក្សាដ៏តូចមួយនេះបានប្រកាសអាសន្នជូនដំណឹងអំពីគ្រោះថ្នាក់នៃការប្រើប្រាស់ថ្នាំ benzodiazepinesទៅលើអ្នកជំងឺខ្សោយបេះដូង ។ គាត់បានបន្តថា ភាគច្រើននៃអ្នកជំងឺទាំងនេះគឺមានវ័យចាស់និងមានជំងឺ ផ្សេងទៀតក្នុងនោះជំងឺសួតជាដើម ៕
0 comments:
Post a Comment