ថ្ងៃពុធ ទី១១ ខែកុម្ភៈ ឆ្នាំ២០១៥ ម៉ោង ១៦:១៩
ខេត្តស្វាយរៀង ៖ ជនសង្ស័យពីរនាក់ត្រូវសមត្ថកិច្ចការិយាល័យនគរបាលព្រាហ្មទណ្ឌកំរិតធ្ងន់នៃស្នងការដ្ឋាននគរបាលខេត្តស្វាយរៀង ឃាត់ខ្លួនពីបទឆបោកប្រាក់ កាលពីវេលាម៉ោង៤រសៀល ថ្ងៃទី១០ កុម្ភៈ ២០១៥ នៅចំណុចភូមិធ្លក ឃុំក្រោលគោ ស្រុកស្វាយជ្រំ ខេត្តស្វាយរៀង ។
បើតាមសមត្ថកិច្ចបានឱ្យដឹងថា ជនសង្ស័យមានឈ្មោះស៊ុន ធីចំណាន ភេទប្រុស អាយុ២០ឆ្នាំ និងម្នាក់ទៀតឈ្មោះពេញ សុធឿន អាយុ១៩ឆ្នាំ ។ ទាំងពីរនាក់មានមុខរបរមិនពិតប្រាកដ និងមានទីលំនៅក្នុងខេត្តពោធិ៍សាត់ ប៉ុន្តែបានមកស្នាក់នៅបណ្តោះអាសន្នក្នុងភូមិស្វាយចេក ឃុំព្រៃឈរ ស្រុកកំពុងត្របែក ខេត្តព្រៃវែង ។ រីឯជនរងគ្រោះមានឈ្មោះ ម៉ុត វណ្ណាន ភេទប្រុស អាយុ៣៥ឆ្នាំ មុខរបរលក់គ្រឿងសូឡា និងមានទីលំនៅនៅរាជធានីភ្នំពេញ ។
ប្រភពបន្តទៀតថា ដំបូងឡើយជនរងគ្រោះ និងជនសង្ស័យមានការរកស៊ីទិញលក់សូឡាជាមួយគ្នានេះតាំងពីខែវិច្ឆិកាមកម្ល៉េះ ដោយជនសង្ស័យបានយកសូឡាពីជនរងគ្រោះជាបន្តបន្ទាប់ ដោយមិនបង្វិលប្រាក់ឱ្យឡើយ តែបានសន្យាថានឹងប្រគល់ប្រាក់ទាំងអស់នៅថ្ងៃទី១ កុម្ភៈ ២០១៥ ។ លុះមកដល់ថ្ងៃកំណត់មិនឃើញជនទាំងពីរប្រគល់ប្រាក់តាមការសន្យា ជនរងគ្រោះក៏បានទូរស័ព្ទទៅកាន់ពួកគេ ប៉ុន្តែមិនអាចទាក់ទងបាន ទើបតែថ្ងៃទី៧ កុម្ភៈ ២០១៥ ទើបអាចទាក់ទងបាន ។
នៅពេលជនរងគ្រោះសួរនាំពីប្រាក់ដែលត្រូវសង ជនទាំងពីរក៏បានប្រាប់មកវិញថា បើចង់បានប្រាប់ទាល់តែយកសូឡាមកឱ្យបន្ថែម ដោយឱ្យជនរងគ្រោះយកមកប្រគល់ឱ្យនៅស្រុកកំពង់ត្របែក ខេត្តព្រៃវែងទៅវិញ ។ ដោយមានការសង្ស័យ និងខ្លាចខាតបង់កាន់តែច្រើននោះ ជនរងគ្រោះក៏បានមកដាក់ពាក្យបណ្តឹងនៅការិយាល័យព្រហ្មទណ្ឌកំរិតធ្ងន់ឱ្យជួយធ្វើការតាមរកជនសង្ស័យទាំងពីរតែម្តងទៅ ។
ក្រោយពីទទួលបានពាក្យបណ្តឹងសមត្ថកិច្ចក៏បានឱ្យជនរងគ្រោះធ្វើការទាក់ទងទៅកាន់ជនទាំងពីរ ដើម្បីបញ្ជោតថាបានយកសូឡាថ្មីមកប្រគល់ឱ្យហើយ តែដោយសារជួលរថយន្តឈ្នួលមកទើបមិនអាចយកទៅប្រគល់ឱ្យដល់កន្លែងណាត់ ដោយតំរូវឱ្យជនទាំងពីរឡើងមកយកនៅភូមិធ្លក ឃុំក្រោលគោ ស្រុកស្វាយជ្រំ ខេត្តស្វាយរៀងវិញ ។ ដោយមិនដឹងថានេះជាការបោកបញ្ជោតពីសំណាក់សមត្ថកិច្ច ទើបជនទាំងពីរបានបើករថយន្តកាមរីឆ្លាម ពាក់ស្លាកលេខភ្នំពេញ 2J 1249 មកទទួលរបស់ទៅតាមការណាត់ចុងក្រោយ ហើយក៏ជាប់អន្ទាក់សមត្ថកិច្ចតែងម្តង។
បច្ចុប្បន្នជនសង្ស័យទាំងពីរ សមត្ថកិច្ចកំពុងធ្វើការសាកសួរ ៕
0 comments:
Post a Comment