ប្រភពមកពី ដើមអំពីល
ភ្នំពេញ ៖ កាលពីថ្ងៃទី១០ ខែកុម្ភៈ ឆ្នាំ២០១៥ លោក ឆាយ វណ្ណា អនុរដ្ឋលេខាធិការ បានអនុញ្ញាតឲ្យគណៈប្រតិភូ របស់អង្គការមិត្តសំលាញ់ ដែលដឹកនាំដោយលោក សារ បិនតា ចូលជួបពិភាក្សាការងារ ពាក់ព័ន្ធនឹងការងារ ស្តារនីតិ សម្បទា ដល់ជនរងគ្រោះ ដោយសារគ្រឿងញៀន នៅក្នុងមជ្ឈមណ្ឌលជាតិព្យាបាល និងស្តារនីតិសម្បទា អ្នកញៀន គ្រឿងញៀន នៃក្រសួងសង្គមកិច្ច អតីតយុទ្ធជន និងយុវនីតិសម្បទា ។
ថ្លែងក្នុងជំនួបពិភាក្សានោះ លោក ឆាយ វណ្ណា អនុរដ្ឋលេខាធិការ បានសម្តែងនូវការកោតសរសើរ និងវាយតម្លៃខ្ពស់ ចំពោះកិច្ចសហប្រតិបត្តិការ រវាងក្រសួង និងអង្គការមិត្តសំលាញ់ នាពេលកន្លងមក ពោលគឺចាប់តាំងពីឆ្នាំ១៩៩៥ មក ម្ល៉េះ ដោយក្នុងនោះ បានសម្រេចបាននូវសមិទ្ធិផលជាច្រើនគួរជាទីមោទនៈ ។
លោកអនុរដ្ឋលេខាធិការ ក៏បានស្នើសុំឲ្យអង្គការមិត្តសំលាញ់ ជួយរៀបចំដំណើរការទទួល និងគ្រប់គ្រង ជនរងគ្រោះ ដោយការប្រើប្រាស់គ្រឿងញៀន ដើម្បីបន្សាបព្យាបាល និងស្តារនីតិសម្បទា នៅក្នុងមជ្ឈមណ្ឌលជាតិព្យាបាល និង ស្តារនីតិសម្បទា អ្នកញៀនគ្រឿងញៀន ដែលអនុវត្តដោយបុគ្គលិករបស់អង្គការមិត្តសំលាញ់ ដោយសហការជាមួយ មន្រ្តី នៃមជ្ឈមណ្ឌលជាតិ ក្រោមការគ្រប់គ្រងរបស់ក្រសួង ស.អ.យ ។
ជាការឆ្លើយតប លោក សារ បិនតា តំណាងអង្គការ មិត្តសំលាញ់ ក៏បានទទួលយកនូវសំណូមពរ និងសម្តែងនូវភាពរីក រាយក្នុងកិច្ចសហការនេះ ដើម្បីរួមគ្នាផ្តល់សេវាជូនកុមារ ជនអនាថា ហើយជាពិសេស ជនរងគ្រោះដោយសារគ្រឿង ញៀន ។ ប៉ុន្តែ ខាងអង្គការទាមទារពិនិត្យលើគម្រោងថវិកា និងគោលការណ៍ជាមុនសិន ដើម្បីធ្វើយ៉ាងណាឲ្យស្រប តាមគោលនយោបាយរបស់ក្រសួង ក៏ដូចជារាជរដ្ឋាភិបាលកម្ពុជា ។
គួរបញ្ជាក់ផងដែរថា មជ្ឈមណ្ឌលជាតិព្យាបាល និងស្តារនីតិសម្បទាអ្នកញៀនគ្រឿងញៀន បានបង្កើតដោយអនុក្រឹត្យ លេខ១៦២ អ.ន.ក្រ.ប.ក ចុះថ្ងៃទី២២ ខែធ្នូ ឆ្នាំ២០១០ ស្ថិតក្រោមការគ្រប់គ្រង របស់ក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងគោលបំណង ៖ បន្សាប ព្យាបាល អប់រំ ស្តារនីតិសម្បទា បណ្តុះបណ្តាលជំនាញវិជ្ជាជីវៈ ដោយ មិនមានការរើសអើង និងធ្វើសមាហរណកម្ម អ្នកជាសះស្បើយចូលទៅសហគមន៍វិញ, ជួយឲ្យមានការកាត់បន្ថយ គ្រោះថ្នាក់ ដែលបណ្តាលមកពីការប្រើគ្រឿងញៀន និងជួយឲ្យមានការគាំទ្រ ផ្នែកសុខភាព ផ្នែកសង្គម និងផ្នែកសេដ្ឋ កិច្ចទៅដល់បុគ្គលគ្រួសារ សហគមន៍ និង សង្គម ៕
