ស្ត្រី​អស់​រដូវ​ទទួលទាន​ចេក​ជួយកាត់​បន្ថយ​ជំងឺ​ដាច់​សរសៃឈាម

ប្រភពមកពី kohsantepheapdaily.com.kh លទ្ធផល​នៃ​ការ​សិក្សា​របស់​អា​មេ​រិ​ក​ចុះ​ផ្សាយ​ក្នុង​ព្រឹ​ត្តប​ត្រ American Heart Association បង្ហាញ​ថា ការ​ទទួលទាន​ចេកទុំ​អាច​ជួយ​កាត់​បន្ថយ​ហានិភ័យ​ពី​ជំងឺ​ដាច់​សរសៃឈាម​ខួរក្បាល​ចំពោះ​បណ្តា​ស្ត្រី​អស់​រដូវ ។ លទ្ធផល​បាន​បង្ហាញ​ទៀត​ថា រាល់​អាហារ​ដែល​សម្បូរ​ទៅ​ដោយ​ប៉ូ​តា​ស្យូ​ម​គឺ​អាច​ជួយ​កាត់​បន្ថយ​ឱកាស​កើត​ជំងឺ​ខាង​ដើម​បាន​១​ភាគ​៤ ។ ការ​ពិសោធ​រយៈពេល​១១​ឆ្នាំ​លើ​ស្ត្រី​វ័យ​ពី​៥០​ទៅ​៧៩​ឆ្នាំ​ចំនួន​៩​ម៉ឺន​១៣៧​នាក់ រក​ឃើញ​ថា ក្រុម​ដែល​ទទួល​បាន​ប៉ូ​តា​ស្យូ​ម​ច្រើន​ប្រឈម​នឹង​កើត​ជំងឺ​ដាច់​សរសៃ​ខួរក្បាល​ពី​១២​ទៅ​១៦​ភាគរយ​ធៀប​នឹង​ក្រុម​ដែល​ទទួល​បាន​តិច​បំផុត ។ ចំពោះ​ស្ត្រី​មិន​មាន​ជំងឺលើសឈាម ប៉ុន្តែ​ទទួលទាន​អាហារ​ផ្ទុក​ប៉ូ​តា​ស្យូ​ម​ច្រើន​បំផុត គឺ​អាច​កាត់​បន្ថយ​ហានិភ័យ​ពី​ជំងឺ​ដាច់​សរសៃឈាម​គ្រប់​ប្រភេទ​បាន​២១​ភាគរយ ។ យ៉ាងណា​ក៏​ដោយ ការ​ប្រើ​ថ្នាំ​ជាតិ​ប៉ូ​តា​ស្យូ​ម​មិន​អាច​បញ្ចុះ​ហានិភ័យ​ពី​ជំងឺ​ដាច់​សរសៃឈាម​បាន​ទេ ។ ក្រុម​អ្នក​ស្រាវជ្រាវ​បាន​លើក​ឡើង​ថា ការ​ទទួលទាន​អាហារ​ផ្ទុក​ប៉ូ​តា​ស្យូ​ម​ច្រើន​នៅ​មុន​ពេល​កើត​ជំងឺលើសឈាម​គឺ​ផ្តល់​អត្ថប្រយោជន៍​ចំពោះ​សុខភាព​កាន់តែ​ខ្លាំង​ឡើង ។ ទោះជា​យ៉ាងនេះ​ក្តី លោកស្រី Sylvia Wassertheil-Smoller សមាជិក​ក្រុម​ស្រាវជ្រាវ​បាន​ព្រមាន​ថា បរិមាណ​ប៉ូ​តា​ស្យូ​ម​ច្រើន​ពេក​គឺ​អាច​បណ្តាល​ឱ្យ​គ្រោះថ្នាក់​ដល់​បេះដូង ហើយ​ថា បុគ្គល​ម្នាក់​ៗ​គួរ​ពិនិត្យ​ឱ្យ​បាន​ច្បាស់​ពី​ចំនួន​ប្រើប្រាស់​សារធាតុ​រ៉ែ​មួយ​នេះ ។ លោកស្រី​បាន​បន្ថែម​ថា ការ​រក​ឃើញ​របស់​យើង​បង្ហាញ​ថា ស្ត្រី​គួរតែ​ទទួលទាន​អាហារ​ណា​ដែល​ផ្ទុក​ប៉ូ​តា​ស្យូ​ម​ច្រើន ។ ប៉ុន្តែ​គេ​មិន​ត្រូវ​ស្វែងរក​ប៉ូ​តា​ស្យូ​ម​ក្នុង​អាហារ​គ្មាន​គុណ​តម្លៃ​សុខភាព​នោះ​ឡើយ ។ អាហារ​មួយ​ចំនួន​ដែល​ផ្ទុក​ប៉ូ​តា​ស្យូ​ម​ច្រើន​មាន​ដូច​ជា ចេក បណ្តា​សណ្តែក​ពណ៌​ស ដំឡូងជ្វា​និង​ដំឡូងបារាំង​ជាដើម ៕ http://i.kspg.co/2016/1/60d417e6-49a1-413e-8886-889e4e968617.jpg http://i.kspg.co/2016/1/670a269a-46b6-4c01-b92a-44550e445a37.jpg